Fundación Arume

Silvicultura e restauración ambiental de montes

Galicia é forestal. Posúe unha gran riqueza natural que necesitamos respectar, coidar e ordenar. A maneira de facelo é mediante silvicultura, a disciplina científica que engloba as técnicas para o cultivo, a conservación e a xestión dos montes.

O aumento na demanda de produtos derivados da madeira está a abrir numerosas oportunidades para a madeira de coníferas e para o sector forestal, un sector estratéxico e de vital importancia para Galicia. Por iso, unha das nosas metas é dar resposta ao mercado impulsando a obtención de madeira de calidade procedente de montes cunha silvicultura coidada e específica. Cada produto de madeira require un tratamento diferente das masas forestais (podas, densidades de plantación, quendas de curta…) porque a calidade da madeira está directamente relacionada cos tratamentos que reciben as árbores durante o seu crecemento.

O noso obxectivo é implantar modelos de produción de madeira de calidade, traballando en equipo con propietarios forestais e comunidades de montes. Para incentivar estas prácticas, difundiremos modelos de silvicultura contrastados, traballaremos para que os prezos da madeira se axusten á súa calidade e, deste xeito, conseguiremos produtos a base de madeira de maior valor engadido.

Bases de traballo

• Restaurar ambientalmente os montes galegos afectados por incendios ou pragas mediante modelos silvícolas para a produción de madeira de alta calidade.
• Impulsar a silvicultura do monte para combater o abandono.
• Colaborar con propietarios forestais e comunidades de montes.
• Promover a relación entre a silvicultura e os avances no ámbito da mellora xenética.
• Traballar en conxunto coas organizacións de certificación de xestión forestal FSC e PEFC.
• Crear dunha rede de montes demostrativos para formación forestal e exposición de resultados.

Avances en curso

É urxente restaurar ambientalmente os nosos montes. Os que foron arrasados por incendios forestais, os que foron afectados pola demarcación do nematodo, os que sufriron catástrofes naturais. É unha necesidade e, ao mesmo tempo, unha oportunidade. A oportunidade de converter os montes devastados nun exemplo para o futuro da silvicultura en Galicia.

Por iso estamos a traballar en atraer investidores para restaurar ambientalmente 30.000 hectáreas de monte galego durante os próximos 10 anos. Empregaremos modelos silvícolas dirixidos á produción de madeira de alta calidade e traballaremos en conxunto coa liña estratéxica de mellora xenética para que as plantas utilizadas sexan resistentes ás enfermidades principais que ameazan os nosos bosques.